Frábær kona

Í sunnudagsviðtalinu í gærkvöld talaði Eva María við Hildigunni Hjálmarsdóttur, 87 ára gamla konu sem var að gefa út sína fyrstu bók, Danska frúin á Kleppi.

Það vill svo til að fyrir rúmum 20 árum kynntist ég þessari frábæru konu. Þá vorum við samtímis á dönskunámskeiði í Danmörku, hún sem BA nemi í HÍ, ég sem kennaranemi í KHÍ. Við vorum þarna nokkrar stelpur á aldrinum 20-70 ára og áttum yndislega tíma saman. Við héldum hópinn svolítið eftir að við komum heim en því miður er langt síðan síðast.

Hildigunnur er ógleymanleg; stórgáfuð, húmorísk, músikölsk, skemmtileg og viðræðugóð. Ég hafði afar gaman af þessu viðtali við hana og hlakka til að lesa bókina hennar sem fjallar um tengdamóður hennar, fyrstu yfirlæknisfrúna á Kleppi.

Gleymin og hundfúl

Vegna ,,næstum því saumaklúbbsins" komst ég ekki á tónleikana í Versölum þar sem Stórsveit Suðurlands, Kristjana og Guðlaug Ólafs komu fram í tónleikaröðinni Tónar við hafið.

Ég var svolítið svekkt að þetta skyldi rekast á en huggaði mig við það að sambærilegir tónleikar yrðu í Ráðhúsi Reykjavíkur á sunnudaginn.

Og sunnudagurinn kom. En ég var heima allan daginn. Steingleymdi tónleikunum.

Ég varð MJÖG fúl út í sjálfa mig yfir þessari gleymsku...sem ég hef enga afsökun fyrir nema e.t.v. elli

Fór hins vegar á hressilega tónleika í kvöld í Þorlákskirkju. Þar sungu Uppsveitasystur (Hrund systir, Sigga mágkona og fleiri hressar konur) og Gospelkór Tónsmiðjunnar. Djassband Suðurlands lék undir hjá báðum kórum. Fínasta prógramm og troðfull kirkja. Mikil stemning.

Lítill og sætur dúett kom óvænt inní prógrammið og sló í gegn með laginu sem færði þeim 2.sætið í söngkeppni FSu um daginn. Þetta voru bekkjarsystkinin hógværu og hæfileikaríku Aðalbjörg Halldórsdóttir og Ómar Berg Rúnarsson  Þau voru yndisleg.

Næstum því saumaklúbbur!

Á miðvikudaginn var fór ég næstum því í saumaklúbb!

Það væri ekki í frásögur færandi nema fyrir þær sakir að ég hef aldrei verið í saumklúbb og hef engan áhuga á því að ganga í slíkan klúbb. Hins vegar hitti ég fimm frábærar vinkonur mínar í sumarbústað uppí Ölfusi í tilefni af því að ein þeirra sem búsett er í Japan var á landinu. Þetta voru gellurnar í Reykjavíkurvinahópnum...sem ég kynntist á Kennóárunum. Engin þeirra er þó kennari!

Við áttum yndislega stund, borðuðum lax, drukkum  hvítvín og töluðum ótæpilega...stelputal

Gistum í bústaðnum en mættum í vinnu morguninn eftir eins og ekkert hefði í skorist.  Gaman, gaman.

Ný lína í blogginu!

Hér eftir mun bloggið mitt fjalla um vinstrisinnaðar stjórnmálakonur!

Maður gæti haldið að ég hefði sett mér ný markmið í blogginu...en svo er nú ekki. Tilviljun að Þórunn og Helle lentu hér hlið við hlið, en báðar eru þær frábærar.

Það er hins vegar eitthvað andleysi yfir mér.

Ég gæti svo sem sagt frá árshátíð Sveitarfélagsins Ölfuss sem var um helgina. Eða heilsufari innan fjölskyldunnar. Nú svo mætti blogga um veðrið, vinnuna, vinina. Hver myndi líka vilja missa af bloggi um álver eða ekki álver, virkjun eða ekki virkjun, raforkusölu eða ekki raforkusölu.

Svo gæti ég bloggað um Mggafréttir, en vísa í því tilliti til Hafsteins Viðars sem er allra manna duglegastur að lesa Mggann og hefur í mörgu sömu skoðanir og ég...

Sósíaldemókratar

Danir ganga að kjörborðinu á morgun. Því miður er sósíaldemokrötum ekki spáð sérlega góðu gengi. Allt útlit fyrir að Fogh-Rasmussen verði áfram forsætisráðherra og myndi stjórn með einhverjum miðjuflokknum.

Ég held þó enn í þá von að þessi kona, Helle Thorning-Schmidt, nái af honum stólnum. Ég held hún sé frábær stjórnmálakona, hún heillaði mig amk uppúr skónum í Egilshöllinni í vor.

Þórunn í Þorlákshöfn

Auglýsingunni hér að neðan hef ég dreift eftir bestu getu. Lauma henni hér inn líka!

Sjáumst í Ráðhúskaffi annað kvöld!

Sissa....sem hlakkar til að heyra í umhverfisráðherranum sínum.

Fundur með umhverfisráðherra. Opinn fundur Samfylkingarfélagsins í Ölfusi verður haldinn í Ráðhúskaffi, Ráðhúsi Ölfuss,  á morgun, miðvikudaginn 7. nóvember og hefst klukkan 20.Gestur fundarins verður Þórunn Sveinbjarnardóttir umhverfisráðherra.Mikið er að gerast í Ölfusi varðandi umhverfismál eins og virkjanir, enn frekari áform um virkjanir inn á vernduð svæði, hugmyndir um álver og loftmengun innanbæjar í Þorlákshöfn.Umhverfisráðherra mun verða með erindi í upphafi fundar um umhverfismál, losunarkvóta og fleira.  Að erindinu loknu verður opnað fyrir spurningar og spjall yfir kaffibolla.

Allir velkomnir.    Stjórnin.

 

Skrýtið....

....að fara í messu og sunnudagaskóla og mega ekki stjórna neinu! Ólöf Björk var að spila í messunni í dag og ég dreif mig með henni til að hlusta. Nú er sá háttur hafður á að messa og sunnudagaskóli er spyrt saman kl.11 annan hvern sunnudag. Þar sem ég var ekki með litlu börnin mín með mér sat ég eftir í kirkjunni og hlustaði á prestinn meðan sunnudagaskólabörnin fóru fram í fræðslu og leik.

Svolítið skrýtin tilfinning....svona eins og maður hafi sleppt hendinni af barninu sínu

En það var gott að hlusta á predikun prestsins og ekki síður Guðs orðið sem að þessu sinni var lesið úr nýþýddu Biblíunni.

Halló Akureyri!

Við fjölskyldan brugðum undir okkur betri fætinum (dekkjunum...vetrardekkjunum) um helgina og skruppum norður á Akureyri. Tilgangurinn fyrst og fremst sá að heimsækja og hjálpa aðeins til hjá tengdafjölskyldunni minni en við vorum líka svo ljónheppin að fá miða í leikhús.

Óvitar eftir Guðrúnu Helgadóttur er frábært stykki, vel leikið og skemmtileg uppsetning. Boðskapurinn líka skýr og skemmtanagildið ótvírætt. Er hægt að biðja um meira í einni leiksýningu?

Hittum ekki marga utan fjölskyldunnar en fyrsta fólkið sem við sáum í leikhúsinu var Þórhildur Helga skólastýra og fyrrum samkennari minn ásamt börnum sínum Lúkasi og Kolfreyju. Lítill þessi bær þarna í norðri!

Ég fór líka í vínbúðina á Akureyri á laugardaginn. Þar inni voru þrír menn...og einn af þeim var Valgeir bróðir minn.  Hann var líka í skreppiferð ásamt fjölskyldu sinni í höfuðstað Norðurlands og var alls ekki kominn til að hitta mig í Ríkinu! Já....algjör smábær þessi Akureyri!

Negrastrákarnir

Allir hafa skoðanir á endurútgáfu bókarinnar 10 litlir negarastrákar. Mér hefur fundist umræðan misjafnlega málefnaleg, en í dag rakst ég á umfjöllun sem segir allt sem segja þarf. Ég gæfi mikið fyrir að komast svo vel að orði sem Gauti gerir í þessari grein.

Afmælisbörn vikunnar

Í mínum ættingja- og vinahópi eiga að minnsta kosti fjórir gullmolar afmæli í þessari viku.

Svava Björk, svilkona  mín átti afmæli þann 20.október. Hana hef ég ekki þekkt nema í þrjú ár en þykir samt undur vænt um hana. Hún giftist í september honum Jónasi mági mínum og var það okkur öllum í fjölskyldunni mikið gleðiefni. Svava er róleg og ljúf stelpa sem gott er að hafa nálægt sér. Svava á Telmu Sif, 6 ára hnátu sem frá fyrsta degi hefur verið uppáhaldsfrænka Jakobs Unnars!

Brynja bróðurdóttir mín varð 14 ára þann 23.október. Hún er falleg og góð stúlka sem hefur mestan áhuga á hestamennsku og knattspyrnu. Hún stundar hvort tveggja af miklu kappi og þykir afar efnileg. Ég er stolt af þessari góðu frænku minni.

Guðrún vinkona mín Kristófersdóttir átti afmæli í gær. 24.október. Hún er hjúkrunarfræðingur og býr í Japan ásamt Javier eiginmanni sínu og börnunum Kristófer og Andreu. Javier er þyrluflugmaður í bandaríska hernum og síðan þau kynntust við störf í Kosovo fyrir margt löngu hafa þau búið vítt og breitt um heiminn, starfs hans vegna. Það var yndislegt þegar þau bjuggu á Keflavíkurflugvelli, þá hitti maður þau stundum. Nú hittumst við alltof sjaldan....

Bjarni vinur minn Áskelsson á afmæli í dag. Bjarni varð einn að mínum fyrstu vinum hér í Þorlákshöfn. VIð byrjuðum að syngja með Söngfélaginu á sama tíma og höfum í gegnum árin brallað ýmislegt saman. M.a. héldum við sameiginlega stórveislu ásamt Jóhönnu vinkonu okkar fyrir þremur árum þegar við fylltum fjórða og fimmta tuginn. Bjarni er nú fluttur héðan en vonandi slitna aldrei okkar góðu vinabönd.

TIL HAMINGJU MEÐ DAGINN ÖLL!

Hér set ég myndir af Svövu, Brynju og Bjarna, fann enga almennilega af frú Guðrúnu.